Súkkulaðikaka með Baileys smjörkremi og súkkulaðibráð

Ég er nú ekkert hrifin af drykknum Baileys og drekk það aldrei en mér finnst mjög gott að setja svolítið af því út í smjörkrem og smyrja því á góða súkkulaðiköku 🙂
Um daginn hittumst við nokkrar vinkonur í hádegismat, keyptum okkur súpu á Súpubarnum og tókum með okkur heim en mig langaði líka að bjóða upp á alvöru köku í eftirrétt. Ég ákvað því að skella í eina svona súkkulaði-Baileys bombu fyrir okkur vinkonurnar. 
Súkkulaðikaka með Baileys smjörkremi og súkkulaðibráð

Ég bakaði einfalda uppskrift af þessari súkkulaðiköku. Já, ég nota mjög oft sömu uppskriftina eins og þið hafið kannski tekið eftir á blogginu mínu en þið skiljið það um leið og þið hafið smakkað hana 🙂 Ég hrærði svo þetta smjörkrem og setti 2,5 msk af Baileys út í kremið þegar það var tilbúið.
Ég veit að þetta sýnist kannski flókið krem en ég lofa ykkur því að þegar þið hafið hrært það einu sinni þá áttið þið ykkur á því að það er í raun mjög einfalt. Kremið er svo mjúkt og létt og alls ekki jafnsætt og hefðbundið smjörkrem (smjör, flórsykur og vanilla). Notið bara aðferðina þar sem þið finnið blönduna á milli fingranna (sjá lýsingu í bloggpóstinum um kremið) og þegar þið finnið ekki lengur fyrir sykurkornum þá er eggjablandan tilbúin fyrir hrærivélina. Og passið bara að hræra nærri stöðugt í blöndunni meðan hún er að hitna.
Hérna er svo að finna uppskriftina að súkkulaðibráðinni.

Súkkulaðikaka með Baileys smjörkremi og súkkulaðibráð Nammið fékk ég flest allt í Kosti en þar fæst stundum svona pínu óhefðbundið sælgæti eins og hvíta KitKat-ið og Hershey’s cookies and cream súkkulaðið. Ég spreyjaði svo Oreo kexið með þessu gullspreyi sem ég pantaði einu sinni frá Þýskalandi …. já – ég missi mig stundum þegar ég sé eitthvað sniðugt kökutengt á netinu 😉
Súkkulaðikaka með Baileys smjörkremi og súkkulaðibráð Eins og ég sagði þá drekk ég aldrei Baileys svo ég kaupi stundum svona litlar minature flöskur ef ég (eða einhver mér nákominn) á leið um fríhöfnina. Ég notaði tæplega eina svona litla flösku í kremið. Svo fannst mér tilvalið að skella flöskunni – tómri – ofan á kökuna og nota hana þannig sem skraut.
Súkkulaðikaka með Baileys smjörkremi og súkkulaðibráð

Njótið vel (og passið ykkur að klára ekki Baileysið áður en þið þurfið að setja það út í kremið 😉 )

FacebookTwitterShare

Skildu eftir svar

Netfang þitt verður ekki birt. Nauðsynlegir reitir eru merktir *