Þessar súkkulaðibitakökur eru svakalegar! Það segir svolítið um það hversu góðar þær eru að ég hef aldrei náð að frysta þær – þær klárast alltaf áður en til þess kemur.

Þetta eru ekki hefðbundnar smákökur eins og þið sjáið á myndunum heldur lófastórar súkkulaðibitakökur sem smakkast æðislega einar og sér en fullkomnast með bolla af góðu heitu súkkulaði með miklum rjóma (oink oink)

Hérna kemur uppskriftin:

• 230 gr mjúkt smjör (við stofuhita, ekki bráðið)
• 180 gr púðursykur
• 160 gr sykur
• 2 egg
• 1 tsk vanilludropar
• 320 gr hveiti
• 1 tsk matarsódi
• 200 gr súkkulaði (dropar eða saxað súkkulaði)

Aðferð:

• Hitið ofninn í 180°C.
• Hafið til bökunarplötur og smjörpappír eða sílikonmottur.
• Setjið smjörið og sykurinn (líka púðursykurinn) í hrærivélaskál og blandið vel eða þar til blandan er orðin ljós og létt.
• Bætið eggjunum og vanilludropunum út í og blandið áfram.
• Stoppið hrærivélina og skafið vel innan úr skálinni með sleikju, blandið áfram í eina mínútu.
• Blandið þurrefnunum út í og blandið áfram vel saman.
• Hellið súkkulaðidropunum út í deigið og blandið aðeins áfram.
• Búið til litlar kúlur úr deginu með ísskeið eða teskeiðum. Ég fékk mína ísskeið í Kosti um daginn á ca. 1.200kr. Sú ísskeið er 4 cm í þvermál. Snilldin við að nota ísskeið er að kökurnar verða allar jafn stórar.
• Kökurnar leka svolítið út svo það er mikilvægt að hafa gott bil á milli þeirra á bökunarplötunni.
• Bakið í miðjum ofninum í 12-15 mínútur eða þar til kökurnar fá á sig gylltan lit. Passið að baka þær ekki of lengi því þá verða þær svo stökkar.

Njótið vel!